مرتبة الشرف

تضيق بي الدنيا بكبرها من معابيـس الوجيـه

و هاذاك لامنه تبـسـم شفـت للدنيـا طـرف

مني و إلي احببته و هو حبنـي منـه و إليـه

من غير لا أنا أعترف ومن غير لا هو يعترف

ليه آتحاكـا و كلبـوي يعـرف غايـة كل إبيـه

اليا فرح أفرح و دمعـه لاذرف دمعـي ذرف

اغليه يعني اعشقه اعشقه يعنـي امـوت فيـه

يعني أنا ميت مع عشقـه و مرتبـة الشـرف

ميت و يعشق و السبب ما فيه داعي ان آحكيه

الغيـد فالدنيـا هـواه وهـو لحالـه محتـرف

الشامخ اللي لا أقبل و حضن يديني فـي يديـه

تراعدت فرايصـه بالغنـج و أتساقـط تـرف

امشي معه من غير لا اين و لا كيـف و ليـه

من حيث ما يجرفني آغمض عيوني و أنجـرف

ان قال لا أقول لا ان قـال أيـه اقـول أيـه

ما عرف مسمع ما أرى ما أرى مسمع ما عرف

اللي اعرفه انـي أبيـه يتجمـل بـي و أبيـه

و كان العدل في صدته سجلني اكبـر منحـرف

يغفرلـي الله و الله يديمـه و يرحـم و لديـه

علمني ان البعد نكسه حـال و الصـده قـرف

سعد بن علوش

تصاوير 15

بسم الله الرحمن الرحيم ..

اسعد الله اوقاتكم بالطاعات وبكل خير ومسرة وسعادة وهناء ..

^_* ماشتقتوا لي .؟؟ اكيد في احد مشتاق بس مستحي يقول .. ^_^

المهم كيف حالكم .. وشلون من يعز عليكم .. ان شاء الله اموركم طيبه ..؟؟ ..

بصراحة انا مقصر مع المدونة ومع احبابي متبعين المدونة .. ولكم حق علي .. لكن العذر من الله ثم منكم على التقصير .. لأني كنت مشغول في بعض الامور ...( الله لايشغلنا الا بطاعته ) .. الى حد الرقبة .. لكن ابشركم الامور الحمد لله طيبه ... وترى الحياة حلوة .. ووناسة وسعة صدر ..

هذا الله يسلمكم قبل فترة كنت في زيارة خاطفة ( صد ورد ) الى واحة المملكة ( الاحساء ) عشان اخلص بعض الامور هناك .. وصادف مروري من عند مبنى اثري .. اسمه قصر محيرس .. او المحيرس .. وكنت مستعجل فأخذت له صورة خاطفة .. لكن ان شاء الله اذا حصلت لي فرصة ثانية .. رح احاول اصور بعض المواقع والاماكن الجميلة فيها .. ولا انسى عتبي على اخوي عيسى (احساس ) بما انه منه اهلها المفروض يتحفنا ببعض ماعندهم من مواقع اثرية وغيره ..

اما هذي الصورة فهي كانت هدية من الغالية ( امي ) الله يمد في عمرها على طاعته بمناسبة نجاحي في الترم الاول .. وتشاركت معها اختي فديتها بنت الثلاثين .. عسى الله يوفقني واياكم في حياتنا العملية والعلمية ...

وهذي بعد من الحنونة .. ياجعلني ما ابكيه ولا ابوي .. قولوا امين ..وصت اختي تكتبها بنفس اللهجة .. وماقصرت اخيتي .. وطبعتها وفاجأوني بها .. وكانت احلى هدية وماتتصورون قد ايش فرحتي بها .. ياجعلني ماخلا منكم .. ياهلي ياعزوتي ياعصابة راسي... وعسى الله يقدرني ..واحقق اللي في بالي واسعدكم يارب ...

اما هذي لكم هدية صغيرة من اخوكم المقصر معاكم .. ضيافة بسيطه لكم ..

... وسامحونا على القصور ....

Carbon

السلام عليكم ورحمة الله وبركاته ..

كيف حالكم ..؟ ان شاء الله مبسوطين ..؟

الله يسلمكم ... عندي مويضيع صغير .. عن التواصل ... بس مو التواصل الاسري ...!!!

التواصل بين الجيران .. واهل الحي ...

كنا تقريبا قبل سنتين نسكن في حي يعتبر شعبيا .... عشنا فيه احلى ايام حياتنا من طفولتنا الى قبل ماننتقل منه ... كان يميز هذاك الحي والاحياء المشابهه له .. التواصل بين الجيران .. حتى وان كان بينك وبين جارك مشكله يبقى فيه تواصل فيه سؤال عن بعضنا البعض .. كنا نتقابل بعد كل فرض نسأل عن بعض نخدم بعض .. نهدي بعض .. لو نقص عليك شي في بيتك تعال وخذه من عندي وانا نفس الوضع .. كانت في لحمه ( من التلاحم لاحد يفكر اكل ) كنا نعرف بعضنا البعض .. اذا دخل غريب في الحارة يعرف بمجرد دخوله ..

لو تغيب عن بيتك كرجل ماتخاف على اهلك ابدا .. حتى الحريم مايخافن .. لان في جيران لهم مثل الاخوه .. رغم اننا في مدينه ..( لانه من المتعارف عليه ان العاده هذي ماتتواجد الا في القرى والهجر .. اما المدن غلبت عليها المدنية وتخلت عن بعض عاداتها وتقاليدها ) لكن موجوده .. كنت ازور بعض الاقارب والاصدقاء في احياءهم ماكنت اشوفها الا نادرا ... واذا سألت الشخص عن جاره قال ماعرفه ومافي علاقه بيننا ... ليه طيب ...؟ وش السبب ..؟

كنت اقول في نفسي الحمد لله احنا بخير .. متكاتفين حتى لو اذاني جاري والا اذيته ... نبقى متحابين متكاتفين ... لكن ....

من اول مانقلنا الى البيت الجديد ... او بمعنى اصح الى الحياة الجديده .. تغيرت الاوضاع .. جاري الملاصق لبيتنا ماعرف من اسمه غير الكنيه ... ؟ ... يمكن مافي من الجيران اللي حولي الا واحد او اثنين هم اللي بيني وبينهم تواصل .!!!!

من بداية مانزلنا في البيت الجديد ... كنت بعد كل فرض وانا راجع للبيت اذا صادفت احد الجيران ... اسلم عليه ... السلام عليكم .. مايرد السلام ... وبعضهم يعطني نظرة من فوق الى تحت ويصد .. ليه طيب ..؟ ترى مابي منك شي انت ووجهك ...

لي جار له من اسمه نصيب ... اسلوبه حسن وتعامله حسن .. واذا غبت يسأل عني .. اذا غاب الوالد عن المسجد سأل عنه .. ويبلغ جماعة المسجد اللي الى الان بعضهم ماتنزل شوي وتكرم علينا عشن نتعرف عليه ... وفوق هذا شين وقوي عين يجي يسأل عن ابوي .. !! اما حسن لو ماسأل ما اعتب عليه لاني اعرف الاعمال اللي عنده والمشاغل .. ومع هذا يسأل ويعتذر ان ماعنده علم ..

هذا الحسن .. صادف مره اني طلعت معاه مشوار .. ( مو اول مره ) .. كان عنده شغيل بسيط و سويناه .. المهم فاجأني بهدية بسيطه .. من وجهة نظري تقوي العلاقة بين الجار وجاره اكثر من اي وقت مضى ... ( وانا ماقول كل واحد لازم يهدي جاره هديه ويروح السوق ويشتري ويسوي لنفسه زحمه ..) قد تكون الهدية .. الابتسامه الدائمه .. السؤال عن احواله .. عن ابناءه .. عن اي شي هو يحب ان تسأله عنه ..

اتمنى في يوم من الايام ويكون قريب ان شاء الله .. ترجع العادة اللي تعودنا عليها في الصغر وفقدناها ونحن كبار .. مع العلم اننا نحتاجها في الكبر اكثر من الصغر .. الترابط بين الجيران .. بين ابناء الحي .. التواصل ..

* ادري العنوان ماله دخل بالموضوع بتاتا البته ... ^_^

هذا الحسن اهداني عطر ..( اسأل الله العظيم ان يطيبك من طيب الجنه يا بو ماهر .. ويفرج عليك وييسر لك امورك ..)

صورته وقلت انزل عن الحسن وعطره .. من باب الشكر ..

ومن لايشكر الناس لايشكر الله ..

كلمة صغيرة في حروفها .. كبيرة المعنى ان خرجت من الاعماق ... شكرا .. بو ماهر ...

صوغة الحجاج

السلام عليكم ورحمة الله وبركاته

اسعد الله اوقاتكم بكل سعادة وفرح ...

هذا الله يسلمكم امس صادف وصول حجاجنا من رحلتهم الايمانية عسى الله يتقبل حجهم ويقبلهم عنده ...

المهم كان من ضمن امتعتهم صوغة ( هدية ) حجاج ومن بينها حاجة قديمة مررررة .. امي الله يطول بعمرها على طاعته تقول ان جدي الله يغفر له كان يجيبه لهم اذا رجع من الحج .. وللمعلوم نفس المواد سابقا هي نفسها حاليا ... يالله ذكريات الكل امس عاش الماضي البعيد والقريب ... فحبيت انكم تشوفونها ويمكن احد الزوار مالحق عليها او ماشافها ففرصة يشوفها الحين ...

تمنياتي لكم بالسعادة والعودة للماضي ...

هذي صورة الحلويات او المكسرات سموها مثل ماتبون هي اللي قديمة

هذي مجموعة كاملة للهدايا ..