الأربعاء، 27 مايو، 2009

الروائح الزكية


اليوم مسكت معاي غلط عن فوائد العطور والروائح الزكيه فجلست افرفر بشوارع الشبكه العنكبوتيه ومن حارة لحارة ومن نافذ لنافذ بس هذا اللي لقيته ويسد شوي من المعلومات اللي انا ابيها ولقيت انه :

وجد الباحثون بعد تقييم تأثير الروائح المختلفة في السيطرة على وزن الأنسان أن الأشخاص الذين يتمتعون بقدرات شم قوية واستنشاق روائح طيبة عند شعورهم بالجوع قد فقدوا حوالي 2.5 كيلوجرام لمدة 6 أشهر دون أن يغيروا طبيعة غذائهم اليومي أو أنماط الحركة والرياضة التي يتبعونها...
باالاضافه الى ما أكدته مؤخرا بحوث الدكتور (الان هير) مدير مركز شيكاغو للعلاج بالاختبارات والعطورات , والذي اعلن ايضا انه تمكن من اعداد خليط من الروائح والعطورات النباتيه تؤدي الى تحسين عملية التعلم والقدره على الانجاز في العمل.
يقول الباحث انه لا يعلم سبب ذلك , لكنه وضع مجموعه من الاحتمالات:
1-ان الروائح والعطور ربما تجعل الانسان في حاله مزاجيه جيده وهذا يساعد على التعلم بسهوله اكثر.
2-المعطرات يمكنها فيزيائيا تغيير موجات المخ مما يؤثر في المنطقه المرتبطه بالتعلم والذاكره.

3-الروائح تمنح قدرا من الاحساس بالارتياح الذي يساعد على التعلم والانجاز.

المهم انا رحت السوق واشتريت مجموعه عطور بس قلت اوريكم شوي منها والباقي عاد انتوا تروحون تشترون من السوق



وبما ان الحديث في نفس السياق.....<<<< متعوب عليها السياق هذي
راح اكتب مجموعة اسماء لبعض العطور بس بشرط اللي يشتري له يجيب لي عطر معاه ......امزح معاكم بس تكفيني الدعوه الطيبه في ظهر الغيب
عطر اسكادا الاحمر

فندي بلازو
شانيل N5
هوجو اكس اكس
جفنشي اجيوديمون
سي اتش
بلاك اكس اس
اللور شانيل
بربريه
بلغاري

الزبده انهم واجد العطور بس هذي نبذه بسيطه عنها لكن عني انا في نوعية الكثير مايحبها لكن احنا بالبيت تعجبنا ريحتها والكل يتطيب منها وهي دهن العود ونتبخر بالعود يالبى ريحتهم بس والله انهم احسن من الف عطر بس وش نسوي لازم نغير لان التغيير زين مره ..وبس خلاص

ولكم مني اجمل الروائح العطرية في باقي بسيطه على قناة شاب طموح








السبت، 23 مايو، 2009

الصداقه + القهوة = متعه الحياة

ياما حلا الفنجال مع سيحة البال ..... في مجلس مافيه نفس ثقيله ... <ادري انه جاي كذا بس له دخل بالموضوع ..خخخخ

اي والله يازين الفنجال مع الناس الطيبين المرحين اللي نفسهم خفيفه وروحهم تعطيك دفعة اولى من الاقساط اقصد دغعة معنويه وتتمنى يطول الوقت معها .... والله يا اخوان ان لانسان اذا كانت اخلاق عاليه وروحه تحب الضحك والمزح الخفيف وفي وسط سوالفهم يذكرون بآيات الله وأحاديث المصطفى صلى الله عليه وسلم ... مايمنع بعد بقليل من الدسم (نكت ) خفيفه وكل شخص يسأل عن الثاني .. وان طلب فزعة لباها .... اخير من الشخص اللي عكس ماذكر وبما ان الكلام يجر الكلام هذي ابيات لشخص عزيز على قلبي احببت ان اكتبها هنيا ....



بعض العلوم يجف من دونها الريق

وبعض العلوم يجف ريقي وراها

كحلت عيني من وجيه المطاليق

للساعه اللي يثني من عصاها

ويومي زبنت العين في موقف الضيق

حصلت من كحل طرفها عماها

بعض اللحى عز في وجه المطاليق

وبعض الوجيه اكبر خزاها لحاها

يغرك ازوال الرجال المطافيق

لو انها ماتختلف عن نساها

هزايلن تلهث ورى الهرج وتضيق

من قبل تخلق والزمان يهاجاها



وبالهمناسبة حبيت اعزمكم على قهوة طيبة وهذا الله يسلمكم الصورة الاولى شغل ايديا وهي كانت بمقر العمل من قهوة ماكنا احنا اربعة اشخاص مشافيح على القهوة قمت وزينتها بس وقتها عاد طفت الكاميرا ومامداني اصور الدله والفناجيل ... صب القهوة للرياجيل يا...

اما الثانية فهي من شغل اختي بالبيت طبعا فقلت هذي تعويض عن اللي راح من مواقف تعوض وسموا على قهوتكم ويالله حيهم .... ارحبوا ارحبوا ....











الأربعاء، 20 مايو، 2009

مسافره

أمس الثلاثاء في تمام الساعه 1.20 تحركنا من عند البيت وكان معي الحنونه (امي) الله يرجعها لنا بالسلامه ويديم عليها الصحه والعافيه ولايورينا فيها اي مكروه ولا كل الحنونات يارب .. المهم كانت امي تبي تروح لمسقط رأسها اول شي لتقوم بواجب عزاء ثم تزور خواتها وقرايبها وثمن تشوف لها علاج عن الم المفاصل ياجلعني فدوتك يا يمه .... وانا اللي اقوم واوديها وسافرنا ذاك الطريق اللي يجيب المرض واحنا بالطريق سولفنا وبعدين شغلت الراديوا على اذاعة القران وكان فيه شيخ يذكر قصص وجلسنا نسمع المهم لغاية ماوصلنا وامي الله يخليها لنا ويخلي لكم امهاتكم ... تدري اني مدمن ...امممممممم ... مدمن قهوة كانت تقول كان جبت لك دلة قهوة وياك ... ويوم وصلنا بسلامة الرحمن ورحنا بيت خالتي بما انها اكبر اخوان امي فالمتعارف عليه ان اللي يروح هناك لازم يبيت عندها عسى الله يطول بعمرها ويجعل بيتها عامر بوجودها يارب ....المهم وعقب ماصليت الفرض وانا اللي نويت ارجع للدمام وتجي الحنونه تقول اسوي لك دلة قهوة قبل ماتروح ... فديتها هالام ...قلت لا يمه ياجعلك سالمه كاس يكفي المهم قالت تركد ياولدي الله الله على روحك انتبه لاتسرع واذا وصلت دق علي وطمني قلت تامرين امر يالغاليه ..
والله بصراحه ودي اتكلم عن امي بس اخاف ... اقصر في حقها بالكلام ... الام مايوفي حقها مجلدات .... فديتك يايمه ....
تحب الكل صغير وكبير ماتحقد على احد ولاتشيل على خاطرها من احد قلبها ابيض ومفتوح للجميع ماترفض احد يلجأ لها بعد الله وتسمع شكاوي الناس في عيالهم في زوجاتهم في ازواجهم في جيرانهم في كل شي ...
طبعا امي ماتعلمت في مدارس ولا حتى كتاتيب من اول... تعلمت من الحياة ... لكن تعرف احكام شرعيه واحاديث وقصص من السنه (قولوا ماشاء الله ) لكن كانت اذا شافت في التلفزيون اي شيخ يتكلم عن اللي مايحفظ القران تقول الله يغفر لامي وابوي اللي ماعلمونا ولا ودونا الكتاتيب ... وش خانة الانسان الي ماتعلم ... العمي ماهو عمي شوف العمي عمى قلب ... اللي مايعرف يقرا مصيبه ... ولما اشوف اعمالها اتعجب واقول عمرنا ماراح نوصل لمستواها ابدا ... تقوم الليل وماتنام ابدا الا اذا صلت القيام كل يوم ... تحرص على صيام النوافل ... تحرص على الصدقات .... تحرص على التواصل مع الجميع ... يعني عادي جالسين كلكم تسولفون وتذكرت احد عادي يعني تقوم وتقول اتصلوا على فلان من زمان ماكلمته .....
انا اتعجب من الشخص اللي يزعل امه او يرفع صوته عليها او يرفض لها طلب او .. قسم بالله اني انفجر غضبا لما اسمع عن احد مزعل امه لو بكلمه او مزعلها ... وحزتها ودي اقوم امغطه لين يحب الارض ويعرف ان الله حق وان هذي امه لو تدوس على راسه مايفتح ثمه بكلمه ... بس عساني ماسمع عن احد انه مسويها ....
والله صعب يا امي اني اكتب عنك لانك اكبر من كل كلمه ومن كل حرف بهالدنيا ...
الله يطول لنا بعمرك على طاعته ويزيدك الايمان ويعطيك الصحه والعافيه ولايحرمنا منك .. الله يجعلنا بارين فيك انتي وابوي ولايحرمنا منكم ولايحرمنا اجركم ...
ابوي بعد له حق عليه بس والله صعب اكتب عن الاثنين في وقت واحد يخوني التعبير واخاف اقصر مع واحد فيهم لكن راح احاول في وقت ثاني ان شاء الله ...
بصراحه خنقتني العبره وانا اكتب هالبوست ماقدر اكمله ...
الله يردك لنا سالمه وغانمه يا أم الخير كله يا الحنونه ...

السبت، 16 مايو، 2009

برنامج الامير محمد


الله يسلمكم ويسمنكم ويخليكم لاهلكم وحبايبكم عندنا بالشرقيه مركز اسمه برنامج الامير محمد بن فهد لتنمية الشباب اهو صج اوب عتيق وايد .... بس له نشاطات كثير ومتميزه بس والله ماتذكرها بس اللي اعرف انه عندهم معهد للغة الانجليزية ( اجلينزي ) والله منتاز حيل وفيه مدربين برضوا قمه في الاخلاق والتعامل المهم ذاك اليوم وانا اللي تمسك معاي الا اصور المبنى بس بيني وبينكم خفت خفت حيل حيل حيل ... لايقولون لي بعدين اني فيني ... والا اني ..... يؤ بسم الله علي اقول ... المهم وانا اللي ادخل واستأذن من السكيورتي ....ابو يوسف الله يستر عليه .... حتى السكيورتي والله انه اديب ومحترم حيل وقمة في الاخلاق والالفاظ ... عسى الله يوفقهم كلهم ويستر عليهم وييسر امورهم ... شد حيلك يا استاذ فايز .... وانت بعد يا استاذ محمد .... ^_*

المهم والله الشباب ماقصروا وقالوا خذ راحتك يا شاب وصور اللي تبي حتى لو تبي تصور فلان وفلان صورهم قلت لا مانبي نصور احد بس الموقع وانا اللي القط لي كم صورة لاني بصراحه مستحي منهم خجلوني بتواضعهم وطيبتهم ... المهم قبل ما انسى موقعهم على طريق الظهران قبل الكلية التقنيه تحديدا مقابل مبنى العثيم اللي للحين ماخلص وما الظاهر انه بيخلص ايه وعلى الطاري ترى عندهم قسم حق الحريم ( القسم النسوي ) .. ترى مافي صور حريم ولا شي لاحد يتحمس مصور عند الرياجيل بس ... المهم طبعا بما ان اللغة الانجليزيه مهمه قلت يعني يمكن نكسب اجر من ورا احد يروح هناك ويستفيد ويدعي لي .. اي لا اوصيكم بالدعوات الطيبه اللي تفتح النفس .. اخليكم مع الصور....









الثلاثاء، 12 مايو، 2009

مشاعر جميلة



وصلتني رسالة من بنيه امورة من زماااااااااااااااااان اعرفها ^_^ المهم انا ذاك اليوم كنت مداوم بالليل وطبعا اللي مايعرف تراني زي الشرطي بس على خفيف هههه المهم وطبيعة عملي شفتات المهم يوم اني رقعت بيتنا في الصباح الباكر < متعوب عليها .. المهم الا وذاك ساعي البريد اللي يدق باب قلبي يستأذنه بالدخول وانا اللي اشرع له البيبان ويدخل يسلمني رسالة من حبيبت قلبي ..^_* (ترى كلكم حبايب قلبي) المهم واستلمت الرسالة باطراف الشرايين وسلمتها للاوردة ووصلتها الى مكانها الصحيح وتربعت في مكانها في البطين الايمن من قلبي .. الله يجعلنا من اهل اليمين ... المهم وانا كلي شوق وافتح الرساله و تو الشمس بدت تتحرش فيني ماتبيني انام بس كابرتها وقريت الرساله ونمت عقبها وانا ابتسم واقول عسى الله يسعد قلبك ياللي ارسلتي الرساله .. وراح انقل لكم بعض منها مع حسن التصرف والسيرة والسلوك ههههههههه ...


الى شاب طموح الغالي ..... الي مايوصف قدرك عندي وانت .... غالي عزيز حبيب الى قلبي .. ملكني قلبك الطيب وتعاملك معي ونصحك لي .... ووالله انك ماقلت كلمة الا استفدت منها وانا والله احب الجلوس معك وافرح اذا شفت زولك .. ماشفت انسان مثلك مثل طيبك واخلاصك ونصحك من كل شي ياليت كل البشر مثلك ... ياشاب لو فيه منك 2 ماشفت انسان يشكي الضيم ويحاتي .....انت رجل بمعنى الكلمه ولو اكتب عنك واثني عليك ما راح اوفيك حقك .... ما اقول الا الله يجزاك خير ولا يحرمنا منك ....


والله اني ادعي لك في قيام الليل انت و.... لاني استفدت منكم الكثير الكثير ... واقول عسى الله يرزقك الزوجه الصالحه ويرزق ....... امين
والسلام مسك الختام ....

من ..... ولقبت نفسها ملكة الحنان ....


اتمنى انها تقرا كلامي هذا فهو موجه لها ولكل شخص يزور هذه المدونه


وانا اقول فعلا انتي ملكة الحنان وسيدته ... وانا ماسويت شي بالعكس هذا واجب وواجب كل شخص مسلم قادر على النصيحه والتعامل بأسلوب حسن ونقل الاداب والقيم الحسنه للاخرين واقلها بابتسامه ...


اقول للجميع الابتسامه مفتاح القلوب ...


اقول للجميع عاملوا الناس بخلق حسن ...


اقول للجميع الحياة حلوة ...


اقول للجميع الحياة فيها الوان زاهيه وجميله اختاروا منها اللون المناسب لكم وعيشوا حياتكم بذاك اللون ..


اقول ياشاب لايكثر وتسوي فيها فيلسوف زمانك خلاص ... اوب زين الحكي الزايد ... طبعا هالحكي لي انا ههههههه


راني كنبغيكم يالزوينين... ^_^ ^_*


طبعا استحي يعني تدخلون بيتي بدون ما اضيفكم شيقولون عني العربان ... هذي به قبايل .... ياكبرها كبراااااه ...واسمحوا على القصور ....






الأحد، 10 مايو، 2009

تصاوير 3




صراآآآحه في اكله دايما تعجبني كثير اوي اوي وبما انه متعشين معكرونه فكلهم يصبون في بوتقه واحده ..>وجه واحد مايدري وش معنى هالكلام بس المهم ..



وعلى فكره مكوناتها بسيطه بزاف بزاف



مكونه من معكرونه وذرة وفاصوليا حمراء وزيتون اخضر شرايح وحاجه كذا مثل الزبادي مدري شنو مكوناتها بس عادي اكيد كل انثى بما فيه ينضح ... اقصد كل بنت تعرفه وتعرف كيف تسويه ... هي اسمها سلطة معكرونه وانا احبها بزاف بزاف ... هع هع
















ياورد من علمك تجرح ... الشك ماهو من اطباعك ...... الزبده اني مدري هي كذا والا غلط واللي يعرف المطلع يقول لي ... عشان فيني طرب وصقال وصنقه وردح اللهم ياكافي ....

المهم اذكر ان في تدوينه في مكان ليس ببعيد عن بيتنا وهي مدونة فتاة الثلاثين تتكلم عن بناتها .. والله اني حبيتهم ذا البنات ماشاء الله عليهم سهلين وبسرعه الواحد يتعرف عليهم ^_* المهم والله وانا اللي اجلس معهم ذيك الجلسه وانبسطت معهم وحاولت فيهم اني اخذ لهم صوره وماصدقت خبر يوم انهم وافقوا واخذ لهم كم صورة بس لكم مني صورتين بس لان الباقي مايصلح تشوفونهم لانهم من غير حجاب ... الا على طاري الحجاب انا عندي كلمة وبصراحه وهي تقرقع في كبدي وابي الكل يسمعها ...

تعجبني البنت المحتشمه واللي تحافظ على حجابها وتهتم فيه وخصوصا عباتها تكون على الراس لان في نظري البنت اللي تحافظ على عباتها وحجابها مثل الورده اللي حولها شوك ماحد يقدر ياخذه الا لما يذوق من الشوك والمر والالم والاذى ... لكن اللي تتهاون فيه بصراحه راح تكون لقمه سهله للذئاب الجائعه والمتوحشه والمترديه والنطيحه وكلهم ... المهم هي كلمه في خاطري وقلتها وافهم يافهيم ....ونرجع لمحور حديثنا ..ماخليت فيها محور .. طيب لكم هذي الصورة عن البنت المحتشمه آآآآآآآآقصد الورده اللي حبيتها وحبتني ^_* ......... طبعا ادري بتقولون هذي مو ورد.... ادري انها فل بس كلهم من نفس الجنس والفصيله ....










السبت، 9 مايو، 2009

حالة صمت

أحيانا الانسان يمر بظروف خاصة في بيته او خارج البيت واحيان تكون عامه ... انا بصراحه امر احيان بحالة صمت عجيبه وارفض الكلام مع اي مخلوق نهائيا خوفا من اني اغلط عليه بكلمه او اجرحه وبكذا اكون اسأت لنفسي قبل ما اسيء له شخصيا ...
انا اليوم ماعندي شي بصراحه لان احس ان مخي فيه اصوات عجيبه ... اصوات مكاين .. اصوات سيارات ... اصوات صراخ اطفال ... اصوات مزعجه بشكل ماحد يتصورها ... حتى الكلام احس نفسي تتكلم لحالها واسمع كلمات غريبه عجيبه ...
افضل ان لا استمر بكتابة هذه التدوينه حتى لااكتب مالا يحمد عقباه ....
حالة صمت ...

الأربعاء، 6 مايو، 2009

فضفضه








آآآآآآآآآآآآآآآآآآآه ياقلبي







والله احيانا الواحد يمر بوقت يكون فيه طفشان وفاضي وماعند ماعند جدتي الله يرحمها المهم عاد انا ذاك اليوم كنت في العمل وكنت توني مستلم العمل من صباح الله خير .... المهم كنت حاط جوالي وكاميرتي وعدتي وشلايلي المهم وتمسك معي غلط الا ارجع ذكريات الرسم ايام المطرسه ... والله واقعد امخمخ وتطلع معي هالصورة الحلوة عسى الله يسلم يديني ^_* ... قولوا ماشاء الله ..















المهم .... تدرون عاد اني اليوم والله مخيخي الايمن اوب راضي يشتغل والايسر مسوي زحمة والشارع فاضي لكن خذوا هالصورة هديه لكم على مروركم وتعليقكم على هالهدره الخاوية ....كنبغيك يالغزال ديالي ... راني توحشتك ... اي صح بس خلاص بعدين يصير خير ....








الثلاثاء، 5 مايو، 2009

تصاوير 2





أحيان كثيرة مادوك تكون وحداني لانها تؤدي بك الى الجنون واللي خلاني انزل الصورة سمعت عن قصة اب الله يغفر له ويرحمه عياله الله لايبارك فيهم ولا في اللي علمهم كيف يبرون بأبوهم كدا ... السالفة انهم ناطلينه في دار الرعاية الاجتماعية (دار المسنين) بعد ما خذوا منه حلاله الله لايحللهم ولا يبيحهم صراحة مدري شلون يكون عندهم قلب والا احساس الا اقول اصلا ماعندهم قلب ولا احساس ... المهم بس خلاص خنقتني العبرة ... عسى الله يجعلنا بارين بوالدينا والله يحفظهم لنا ويطول بعمارهم يارب .....


على طاري الشيبان الله يطول بعمر الموجودين ويغفر للميتين اذكر اني رحت مره لديرتنا وقلت ياولد ليه ماتصور بيت جدك الله يغفر له ويوم اني اروح والا القى البلدية هادمين نصه الله لايوفقهم قال ايش قال ماخذ جزء من الشارع عقب مدري كم 50 سنة مدري اكثر جاي تقول لي ماخذ من الشارع المهم واخذ مجموعة صور لكن اقوى صورة عجبتني حيل حيل هي ...

طبعا للي مايدرون وش الطبخه ... هذا الله يسلمكم ويسمنكم سقف للمجلس وعبارة عن جذوع الشجر محروق عشان يعطي لون بالاضافة لجريد النخل وبس مادري اذا باقي شي المهم هذا اللي انا اعرفه ...

ادري اني راعي شطحات واجد لكن عندي نصيحه للي يدخل ويقرأ من مدونتي ...

اتقوا الله في والديكم قسم بالله ان الحياة بدونهم ماتسوى شي اللي والديه موجودين يحرص على برهم ويلحق عمره لان الجنة تحت اقدامهم .. واذا خالفوك في شغله انتي تبيها وهم ماوافقوا لازم ترضيهم وتحاول تعبر عن رايك لكن بأدب ودون رفض او جدال لانهم يبقون والديك ...

عسى الله يطول بعمار والدينا على طاعته ولايورينا فيهم اي مكروه ويعينا على برهم ورضاهم يارب ...وخلاص

الأحد، 3 مايو، 2009

شمسنا غير






عقب ذاك اليوم يوم اني اروح الكورنيش وتخمني ذيك السوالف ياآآآ الله صادف ذاك الوقت وقت طلعتها وهي تبدا تداعبني ..واداعبها ... .... جليل الحيا ..... المهم وانا اللي اجلس اتمقل فيها وهي تبرز مفاتنها .... والله انها شي ولا ويقولون بعد ان لها فوايد كثيرة ... تلين الجلد .. وتقوي العظام ... وحق ذاك الناس اللي يحبون يتسدحون تعطيهم لون ويصيرون زرق ...


يالالالا لالالالا ... ترى من تولع بأزرق اللون ياويله .... عاشواااااااااااا


هذي الشمس .. ترى قلنا الشمس لحد يجي يقول لي انت وانت ... انا قلت .... المهم صادف بداية شروق الشمس وانا اللي تمسك معي اصورها من كل الجهات .. صحيح هي مالها الا جهة وحدة بس المهم اني حاولت وطلعت بالنتيجه اللي فوق وفي بعد ثانية تجيكم تحت ...وهي تقول لي ساد اجديت يالطموح صورني وخل الناس تفكر فيني وفي قدراتي وانا خجلت منها لانها فعلا نعمة تستحق ان نشكر الله عليها ... تخيلوا عاد ان كل البشر حياتهم بدون شمس مثل الناس يعيشون مدري وين في قلعة وادرين ماتطلع عليهم الشمس ستة شهور والله مو شي ابد ... والا الناس اللي زيهم يعيشون في قريح ماتغيب الشمس عنهم ستة شهور ... شلون تتحملون الليل ستة شهور؟ وهل كيف ووشلون تتحملون الشمس ستة شهور بدون ماتغيب ولا تشرق عليكم .... يا الله رحمتك .. اللهم لك الحمد حمدا يليق يليق بجلالك وعظيم سلطانك يارب على النعم التي انعمت بها علينا ...


اي عاد قبل ما انسى هذي الصورة الثانيه تمتعوا بحليب قليل الدسم وانتوا تناظرون هالصورة ... ^_^ , ^_*



مجلسنا




يا الله اليوم صراحه شي عجيب وناسه الواحد يروح العمل وهو كان عنده اوف من العمل (لغير الناطقين باللهجه الشرقاوية يعني اجازة ) وبصراحه يعني ماكان ودي ارجع اداوم ياليت هالاوف يطول يالله ياهي تصير علوم ياهي تصير سوالف .. سوالف ووناسه ..وناسه وسوالف .. رايحين ورادين ... وسوالف ووناسه ...




المهم عاد انا يوم اني رجعت من الدوام وبعد مادلفت الى بيتنا .. حلوه هذي دلفت .. دخلت البيت كان ادخل على ابوي بالديوانيه واسلم عليه واحب يديه وراسه ثمن اروح داخل البيت وفي طريقي ... اللي يشوفني الحين يقول ماسك طريق خريص .... المهم وانا في طريقي لداخل البيت مريت على المجلس وهو محور تصويرنا اليوم آآآاقصد محور حديثنا المهم ويطري على بالي يوم اني اشتري الكنب ويوم خلصنا ترتيب المجلس وتخمني ام العبيد الا اصور المجلس يا انا ياذا المجلس والله واطقه بذيك الصورتين المهم عاد قلت لازم اروح الحين اسلم على اميمتي عسى الله لايحرمني منهم ابد ويطول بعمرهم على طاعته ويديم عليهم الصحه والعافيه وامهاتكم وواباؤكم يارب المهم يوم اني دخلت والقاها منسدحه (يعني مستلقية على ظهرها ) وانا اللي اطمر الى عندها وهي بوسط الصاله واحب راسها وايدينها ياجعلهم للجنه ان شاء الله ثمن ذلفت على غرفتي وعقب ماخلصت لي كم شغله قلت لازم انزل هالمجلس بكبره على مدونتي الصوغننه يمكن احد يشوف هالابداع ويبين اصير مشرف واسوي له ترتيب حق بيتهم والا المهم عاد .....




هذي صورة المجلس من جهة الباب ....








طبعا هذا طقم وان شاء الله نشوف الطقم الثاني من الكنبات الطيوبات .. اي والله مساكين هالكنبات يكثر مايجلسون على مخهم هالعالم ويتسدحون عليهم ذا البزارين ومايقولون شي ... شكثر حنا ظالمينهم ......




بس بصراحه مدري ليه عاجبتني هالصورة حيل حيل خصوصا انها زاويه وبعدين حركة الاضاءة غير مقصودة يعني بصراحه بصراحه ابداااااااع ماشاء الله علي ... بسم الله علي ... تف تف ماشاء الله ....

الجمعة، 1 مايو، 2009

شعور



ياربي لك الحمد لقيت cd اللي فيه الصور ... ونااااااااااااااااااااسه



المهم راح انزل صورة وحدة بس وهي الحلقه الثانيه من التدوينه الاولى



وطبعا الصورة اكيد لها قصة



وقصة هالصورة كنت هذاك اليوم طالع من العمل الساعه 6 الصباح وكنت رايق مآآآآآآآآآآآآآآآآآآآآآآآآآآآآآآره وقلت ياولد ليه ماتروح الكورنيش تشم شوي زفر وتنعش الرئتين بريحة الزفر والله ماصدقت خبر وادق سلف الموتر وانا اللي طيراآآآآآآآآن للكورنيش والمهم وصلت بسلامة الله وانزل الا ويخمني ذاك الهواء اللي يرد الروح ويعطيك حيويه واتمشى شوي الا ويلفت انتبهاي عدة مناظر بس اليوم راح يكون منظر واحد ان شاء الله راح يكون كل مره ادون فيها راح انزل صورة او صورتين عشان ماتخلص الصور ثثثثثثثثثثث

المهم هذي الصورة وبس