الثلاثاء، 9 فبراير، 2010

دربـ الصمـــآآنـ

السلام عليكم ورحمة الله وبركاته ..
اسعد الله اوقاتكم .. بكل خير وسعادة ووناسة وفلة حجاج ... ^_^
في يوم الاربعاء الماضي ... انطلقنا نحن مجموعة من الشباب .. الى البر .. وتحديدا للصمان .. ( فيضة جغبقه) ..
المهم والله الطلعة ياربي لك الحمد والشكر والفضل والمنه .. كانت ممتعة على انه كان فيها نكبة لكن كان له ميزة ..ودرس .. المهم ... لكم بالطويلة .. والا نختصر المشوار ؟... الظاهر انكم تبونها بالتفاصيل !!... ^_^ ياحبي لكم .. بس .. المهم طبعا انا من سكان الدمام فديتها .. توجهت الى منطقة راس تنورة وفي رواية اخرى ... رحيمة ... والتقيت بأمير الرحلة .. بو مساعد ...( بيض الله وجهك ووجه من عرفني عليك يالذيب .. ) ..( مافي حليب يا استاد ..) طبعا يضبط الحليب .. على الكيف .. المهم وبدينا نرتب الامور ... وتجهيز المواتر وتحميل الاغراض .. وجهزنا الامور الهامة .. مثل جهاز المراسلة ..( اي كوم ) ..وغيرها ..
وبعدها .. التقيت بأخوه .. محمد .. ( الازرقاني ) .. منسم حد الدعسه .. الله يوفقك يالازرق .. خفيف دم .. ومرح .. الله ييسر امرك يالذيب .. وثمن وصل اخو قلبي ورفيق دربي .. واللي عرفني على بو مساعد ...اخوي .. نايف .. بو خليفه ... وعقبها توجهنا لبيت قريب لهم .. لتكملة تحميل الاغراض ..وقابلنا العم .. عبدالعزيز .. الله يمد في عمره على طاعته .. ويصلح له عياله يارب ... والتقيت بأولاده .. وكانوا من ضمن قروب الطلعة ..راشد .. الهادي ... سعد .. بو حلا .. عبدالله ... الشري .. وقريب لهم ... راشد خليل ..( الزول ) .. ههههه ^_^ ..
وبعد تحميل ... الاغراض .. توجهنا الى الجبيل لمقابلة نبيل .. بو احمد .... ومعه مرافقه واللي تعذب معه .. حسن .. بو نوف .. ( نني الصمان ) .. وبعدها انطلقنا بحفظ الرحمن .. الى الصمان .. وكانت الرحلة ممتعة في الطريق .. جدا جدا .. وقبل الوصول .. حصل مالم يكن في الحسبان .. انفجر كفر ( تاير ) سيارة بو احمد .. راعي الاحمر ... وضاقت صدور الشباب الوسيعة .. وقررنا نواصل الرحلة وهي على حالها بعد عدة محاولات ..
المهم وصلنا الى المكان المقصود .. فيضة جغبقه .. وه بس .. وبدينا بحط الرحال .. وشد العيال محازمهم وبدينا نرتب الامور ونشد الخيمه .. وتضبيط المكان .. ومن عقب تقسم الشباب اللي يطبخ العشا ... واللي يسوي الشاي والقهوة .. واللي مدري وش كان يسوي .. واللي كان جنبه يوجعه من الجرح اللي فيه ..مريح على اخر درجه .. ^_^ ... ماغير يصور .. ههههههه هو اللي استمتع يمكن بأغلب الرحلة مريح وكل شي جاهز له ..
وبآخر الليل الشعب رقوود .. وصحينا الفجر .. المهم وعقب الصلاة .. شبة الضو .. واللي يصلح الفطور .. واللي يقطع بصل واللي يقطع طماطم .. واللي كان عليه اكبر دور انه يأكل بس .. هههههههه ... المهم .. وعقبها .. بكم ساعه .. طلعنا مجموعه نبحث عن حل للتاير اللي انفجر بأول الطلعة .. ومالقينا قلنا نروح اقرب مركز للفيضه ونشوف ..وعقبها .. مالقينا شي ... المهم تمشينا وانبسطنا وتسدحنا على هاك الخضار اللي يشرح الصدر .. وانشطحنا .. ورى ذيك السدره .. وتبطح على هالخير الي جا من الله ..

وتصوير ... ووناسه وفلة حجاج .. الله يديمها على كل الشباب اللي كانوا بذيك الطلعة وعليكم يامتابعين مدونتي الاعزاء على قلبي .. ثمن رجعنا قريب العصر ونلقى اللي يقطع اللحم واللي عليه تقطيع بصل واللي يجهز المقادير ..طبعا كله بإشراف الطباخ الكبير .. العم عبدالعزيز ... فديت راسه ..




ومن عقب الليل .. قرروا الشباب يطلعون يجربعون ... ( جربوع .. كائن صغير .. ويصلح مشروع تجاري بعد ... ههههه ) ... وبعد المطامر ومطارد الجرابيع .. وكان بارود له دور كبير ..(طبعا هذا البارود ..كائن حي يقال له سلق .. وهو مخصص للصيد ..) معنا ... ( ماهو للبيع لحد ينشب بحلقي )



عودنا للمخيم وطبخنا عشانا .. وعقبه نمنا بدري لان الجمعه كان اخر يوم للرحلة ... ومن صلاة الصبح ..الكل صاحي والكل يشتغل .. اللي يسوي فطور .. واللي يرتب الاغراض .. واالي نزل الخيمه .. واللي يربط .. واللي مشغول بالتصوير ( هذا شغل بعد .. لحد يهضم حقه ..) ^_^ وعقب ماعينا من الله خير .. وافطرنا زين .. شدينا الرحال للعودة ... ورجعنا من جديد ندور على تاير للاحمر .. هههههههه ياهو قفلها مع العالم كله ... وثمن صرنا مجموعتين عقب العشاء ... مجموعه تروح للجبيل ... ومجموعة تنزل برحيمه ... وطبعا صارت مغامرة مجهولة للي راحوا الجبيل ... وصار غراز .. وبغينا نروح فيها ..لكن الله سترها معنا .. ومشت سهالات ... وهذا فضل من الله ... لان كان معنا العم عبدالعزيز ... كان شفيع لنا عند الحكومه ..( امن الطرق ..) نبي نبعد عنهم ولقيناهم بالوجه .. ههههههههههههههههه والله ياهو .. موقف خطير مره ... كان الاستمتاع لآخر قطرة ... وعقبها الكل رجع لبيته ... ونسأل الله ان يديم المحبة والتواصل والاخاء بين الجيمع .. وان تعاد مثل هذه الطلعة مرات ومرات ...



طبعا انا اتمنى والتمس العذر من الجميع وخصوصا افراد قروب درب الصمان .. لعدم ادراج اكثر من هذا العدد ... وذلك لكثرة الصورة المتوفرة لدي وهي مايقارب .. 1200 صورة ... فأقتصرت على بعضها .. وان شاء الله ستكون هناك تدوينات اخرى بإذن تنزل فيها صور من الرحلة لكن على دفعات ... وسامحونا على القصور جميع من يمر من هنا ...
ولكم مني اجمل تحية ... والى ملتقى درب صمان آخر ... اعذروني على الاطالة المختصرة ... ^_^
*** ملاحظة ... احداثية الفيضة التي اقمنا فيها ...
N 26.3443
E 46.2597
اترككم في رعاية الرحمن وحفظه

هناك 23 تعليقًا:

  1. أولي ... >> تذكرت يومنا صغار ونلعب غميمه

    الله الله ،صورة الوردات الصغيرات الصفرات وااااو

    وراك ماحطيت صورة النياق وفيه ناقه صغيرونه بس الغريب إن النياق مافيها ولا وحده لونها بيج كلهم خوال >> احس انك بتجلدني شاب على هالوصف
    ماشاء الله لايضركم ، يوم شفت الصور وكيف جوكم ، جو فللله وسعة صدر وفلة حجاج ><<< فلة والا شقه هههههه<<<<< ويقولون بعد يازين فنجان قهوة مع سيحة البال في مجلس مابه نفس ثقيله <<< مدري هو صح جذا يقال والا

    الله يجمعكم على طاعته ولا يفرق شملكم ويديم المحبه بينكم ويبعد عنكم اولاد الحرام

    ومرتن ثانيه خذني معكم البس برقع عادي بدو حنا ....

    ردحذف
  2. مرحبا اختيه فديت راسك ..
    والله ياوخيتي الصور كثيره لكن ان شاء الله مره ثانية ننزل صور في موضوع ثاني ..
    اي والله انك صادقه ..
    ياماحلا الفنجال مع سيحة البال .. في مجلس مافيه نفس ثقيلة ..
    امين يارب وشوكرن على الدعوة الطيبة . .
    من ناحية مرة ثانية تروحين معنا .. ان شاء الله
    يحق لك يابنت البدو ..
    مرحبا بك . .

    ردحذف
  3. شاب : قسم طبيعه خلابه ، شي أوب صاحي
    جالسه اتخيل نفسي وانا أمشي على الارض الخضراء
    وبيدي سطل وشعري بوه وردتن صفراء مثل هايدي
    وبعدين يمر من قدامي قروب خرفان ونياق
    شرايك فيني وانا اتخيل >>> هع

    ردحذف
  4. الله يرزقنا الجنه ياوخيتي ...
    اما هايدي عاد ... ههههههههههههه
    بس حلوة هذي .. قروب ..
    خيالك قوي ..

    ردحذف
  5. ماشاء الله لا حول ولا قوة الا بالله.
    رااائع كل هذا الجمال في المملكة العربية السعودية ماشاء الله.
    الصراحة الصور رائعة وتقافة الخروج للبراري عندكم تقافة مميزة حتى على حسب معلوماتي ان هناك مخيمات للعوائل.والجميل في الأمر أنها تكون أيام الشتاء على اعتبار أن الشتاء عندكم تكون فيه الأجواء ربيعية.
    الصراحة إني لأاغبطكم على هذه الطلعة وعلى هذه الأجواء الخيالية وعلى زهور البابونج ^_^.
    الله يرزقنا.
    وانت واخواياك بصحكتم الطلعة وعقبال الجايات ان شاء الله.
    خليت لك الراحة.

    ردحذف
  6. مرحبا بك ياملح ..
    هناك مناطق كثير فيها جمال ابدعه الخالق جل في علاه .. لكن القصور يأتي منا نحن ..
    ايام الشتاء عندنا فعلا احيان يصاحبها ربيع لكن ننتظر فصل الربيع بفارغ الصبر ..
    امين ..
    تركتك بخير ..

    ردحذف
  7. مَملوحة الوصآيف10 فبراير، 2010 1:06 م

    السلآم عليكم ورحمه الله وبركاته ..,
    اوب الصور مرره جنان ..,
    علمنآ يا شيخ التصوير .. نبي نتعلم ..,
    اوب التصوير حلو ..,
    الصراحه عجبني صوره التقاط الشايب يحسسنا بروحه الطيبه ربي يطول في عمره ..,
    وصوره الورود مره حلوه ..,
    اما بالنسبه للأرض الخضراء .., اللون بكبره يفتح النفس والله ..,
    وهذ1 اللي ما تبي تبيعه الا وتبيعه عليآ مافي نبيه يحرس بيتنا ..,
    اما بالنسبه للصوره الأخيره فلله وربي ..,
    ربي لا يغير عليكم المحبه والجمعه ان شاء الله ..,
    << هذره انتي يمه منتس ..,
    مودتي لك .. مملوحه الوصآيف .,

    ردحذف
  8. مملوحة الوصايف ..
    عليكم السلام ورحمة الله ..
    الحمد لله ان التصوير .. عجبكم ..
    تعليم التصوير .. انا احتاج من يعلمني ..
    اما الالتقاط كل شخص وله نظره .. يقدر يختار فيها صورة...
    اما عن اللي تبونه يحرس بيتكم .. ماهو مخصص للحراسه مخصص للصيد فقط ..
    امين ولااياكم ..
    مرحبا بك ..

    ردحذف
  9. نوني والكل يغار من عيوووني11 فبراير، 2010 6:31 م

    واااو صور ولا ارووووووع
    مشاءالله وطلعه راااائعه
    بس عندي سؤااال الصماااان مو عند الرياض والا انا غلطانه والايمكن صمااان ثاني
    موفقيين وانشاءالله طلعات اكثر وانفجار كفرات اكثر ههههههه امزح

    ردحذف
  10. نوني ... يامرحبا بكم ..
    اي والله الصمان حول الرياض ..
    التوفيق للجميع ..
    اما انفجارات اكثر .. داخلين حرب الظاهر .. ههه
    حياك الله

    ردحذف
  11. شكلها الرحلة وناسة ...
    اهم شي انكم غيرتوا جو ...
    و يمعتوا ذكريات حلوة ...

    :)

    ردحذف
  12. اي والله الرحلة كانت جدا ممتعة ..
    والحمد لله .. انبسطنا واستمتعنا ..
    مرحبا بك ..

    ردحذف
  13. ما شاء الله

    وش هالحركات ..وطلعات البر .. يا شاب طموح

    :

    اول شي ..اهنيئك ...على الصحبة الطيبة

    ...والله يديم عليكم الاخوة في الله
    :
    وثانيا ....سلام خاص للعم عبد العزيز
    ...احس اللي يطبخووون ..هم اللي يعطون الرحلة جو ..
    :
    ثالثا ....الصور ...حلوووووه
    .... وخاصة الشباب ...المنشكحين على الفيضه
    :
    رابعا...الحمد لله على السلامه
    ..
    ومن طول الغيبات ...جاب الغنايم
    :
    وفقك الله ورعاك

    ردحذف
  14. ...

    يا شاب طموح ..

    وشلون خيمة البيرق ..عساها تمام
    وهل تنصح بشرائها
    ..

    سلمت لنا

    ردحذف
  15. وش رايك في الحركات يا استاذ اياد ...
    الحمد لله الطلعة كانت ولا اروع ..
    هناك الله بالايمان وطاعة الرحمن ...
    ثانيا الله يسلمك من كل شر ... ويبلغ السلام ..
    اما الانكشاح على هالربيع ... شي ثاني ..
    على فكره انا موجود فيها بس ماراح اقولكم وين ..
    الغنايم ياطويل العمر .. هي معرفتك يا استاذنا العزيز ..
    من ناحية الخيمه .. والله مدري بس ماخذينها من السنيدي .. لكن صراحه ممتازه جدا .. وسهلة وعملية .. الله يوفقكم ان شاء الله بطلعة مثلها ..
    مرحبا بك والله ..

    ردحذف
  16. سلام عليكم

    بصراحه الصور شوقتني لطلعات البر و التخييم

    صور مره حلوه ما شاء الله

    الله يديم المحبه بينكم

    تحيتي

    ردحذف
  17. هذه الطلعات الي توسع الصدر ..
    حمستني اكثر ..
    حلات المكشات بوسط الشتا بعد امطار الوسم ..
    يزين البر وتخضر الفياض وتزهر نباتاتها ..

    ليه ما اخذتني معك شاب .!

    ردحذف
  18. برنسيسه ..
    امين الله يجزاك الله ..
    حياك الله

    ردحذف
  19. احساس ..
    لي الشرف يااخوي عيسى ..
    لكن .. هذا انا علن لك ...
    الطلعة الجاية بتاريخ .. 24 / 2 / 2010
    حياك الله ..

    ردحذف
  20. ماشالله المكان مرررة عجيب
    شكلكم انبسطوا مرة...
    بس اهم شي الشرابات في الصورة التاسعه
    من فوق ههههه ماتوقعت انو احد يحبها

    تحياتي انا & اختي

    ردحذف
  21. اي والله الحمد لله .. كانت مميزة يالله من فضله ..
    حياك الله انتي واختك ..

    ردحذف
  22. السلام عليكم ..
    الصراحة طلعتكم باين عليها حلوه من الصور ..
    يا عيني على بر السعودية لا يعلى عليه .. ما شاء الله .. يا زين خضار العشب يرد الروح .. اما كبسات البر اوووه لها طعم خااص ..
    اشتقت لبر خوالي ان شاء الله بنجيهم .. فديتهم و الله ..
    الله يديم المحبة بينكم و يخليكم حق بعض ..
    دمت بحفظ الرحمن ~

    ردحذف
  23. عليكم السلام ..
    الحمد لله فضل من الله .. الطلعة كانت مميزة ..
    اما الطبخ في البر فهو فن بحد ذاته ..
    مرحبا بك بين اهلك وربعك .. السعودية والكويت .. قلبين في جسد ...
    مرحبا بك ...

    ردحذف