Carbon

السلام عليكم ورحمة الله وبركاته ..

كيف حالكم ..؟ ان شاء الله مبسوطين ..؟

الله يسلمكم ... عندي مويضيع صغير .. عن التواصل ... بس مو التواصل الاسري ...!!!

التواصل بين الجيران .. واهل الحي ...

كنا تقريبا قبل سنتين نسكن في حي يعتبر شعبيا .... عشنا فيه احلى ايام حياتنا من طفولتنا الى قبل ماننتقل منه ... كان يميز هذاك الحي والاحياء المشابهه له .. التواصل بين الجيران .. حتى وان كان بينك وبين جارك مشكله يبقى فيه تواصل فيه سؤال عن بعضنا البعض .. كنا نتقابل بعد كل فرض نسأل عن بعض نخدم بعض .. نهدي بعض .. لو نقص عليك شي في بيتك تعال وخذه من عندي وانا نفس الوضع .. كانت في لحمه ( من التلاحم لاحد يفكر اكل ) كنا نعرف بعضنا البعض .. اذا دخل غريب في الحارة يعرف بمجرد دخوله ..

لو تغيب عن بيتك كرجل ماتخاف على اهلك ابدا .. حتى الحريم مايخافن .. لان في جيران لهم مثل الاخوه .. رغم اننا في مدينه ..( لانه من المتعارف عليه ان العاده هذي ماتتواجد الا في القرى والهجر .. اما المدن غلبت عليها المدنية وتخلت عن بعض عاداتها وتقاليدها ) لكن موجوده .. كنت ازور بعض الاقارب والاصدقاء في احياءهم ماكنت اشوفها الا نادرا ... واذا سألت الشخص عن جاره قال ماعرفه ومافي علاقه بيننا ... ليه طيب ...؟ وش السبب ..؟

كنت اقول في نفسي الحمد لله احنا بخير .. متكاتفين حتى لو اذاني جاري والا اذيته ... نبقى متحابين متكاتفين ... لكن ....

من اول مانقلنا الى البيت الجديد ... او بمعنى اصح الى الحياة الجديده .. تغيرت الاوضاع .. جاري الملاصق لبيتنا ماعرف من اسمه غير الكنيه ... ؟ ... يمكن مافي من الجيران اللي حولي الا واحد او اثنين هم اللي بيني وبينهم تواصل .!!!!

من بداية مانزلنا في البيت الجديد ... كنت بعد كل فرض وانا راجع للبيت اذا صادفت احد الجيران ... اسلم عليه ... السلام عليكم .. مايرد السلام ... وبعضهم يعطني نظرة من فوق الى تحت ويصد .. ليه طيب ..؟ ترى مابي منك شي انت ووجهك ...

لي جار له من اسمه نصيب ... اسلوبه حسن وتعامله حسن .. واذا غبت يسأل عني .. اذا غاب الوالد عن المسجد سأل عنه .. ويبلغ جماعة المسجد اللي الى الان بعضهم ماتنزل شوي وتكرم علينا عشن نتعرف عليه ... وفوق هذا شين وقوي عين يجي يسأل عن ابوي .. !! اما حسن لو ماسأل ما اعتب عليه لاني اعرف الاعمال اللي عنده والمشاغل .. ومع هذا يسأل ويعتذر ان ماعنده علم ..

هذا الحسن .. صادف مره اني طلعت معاه مشوار .. ( مو اول مره ) .. كان عنده شغيل بسيط و سويناه .. المهم فاجأني بهدية بسيطه .. من وجهة نظري تقوي العلاقة بين الجار وجاره اكثر من اي وقت مضى ... ( وانا ماقول كل واحد لازم يهدي جاره هديه ويروح السوق ويشتري ويسوي لنفسه زحمه ..) قد تكون الهدية .. الابتسامه الدائمه .. السؤال عن احواله .. عن ابناءه .. عن اي شي هو يحب ان تسأله عنه ..

اتمنى في يوم من الايام ويكون قريب ان شاء الله .. ترجع العادة اللي تعودنا عليها في الصغر وفقدناها ونحن كبار .. مع العلم اننا نحتاجها في الكبر اكثر من الصغر .. الترابط بين الجيران .. بين ابناء الحي .. التواصل ..

* ادري العنوان ماله دخل بالموضوع بتاتا البته ... ^_^

هذا الحسن اهداني عطر ..( اسأل الله العظيم ان يطيبك من طيب الجنه يا بو ماهر .. ويفرج عليك وييسر لك امورك ..)

صورته وقلت انزل عن الحسن وعطره .. من باب الشكر ..

ومن لايشكر الناس لايشكر الله ..

كلمة صغيرة في حروفها .. كبيرة المعنى ان خرجت من الاعماق ... شكرا .. بو ماهر ...

تصاوير 11

السلاااام عليكم ورحمة الله ...

شلونكم ياجماعة .. ان شاء الله مرتاحين .. اهم شي انتوا مستانسين ..؟ ..

شلونكم مع الطلعات والدوجان في الاماكن الزينة اللي ترد الروح ...؟

هذا الله يسلمكم قبل كم يوم تقريبا 3 ايام .. المهم اتفقنا نحن مجموعة شباب .. قرقرنا نروح ... شاطئ نصف القمر وفي رواية اخري الهاف مون وفي رواية ثالثة البحر ... ^__^

المهم والله الربع ماكذبوا خبر وانا واياهم ^_* .. وطلعنا واستانسسنا وانبسطنا وفليناها على الاخر .. وانا نسيت نفسي مع عظمة الخالق وجمال الصورة الربانية ... سبحان مبدعها ...

المهم طبعا قبل مانجلس مرينا على الطعوس ( القص ) المهم خربناه شوي ثم صورنا كم صورة ثمن اتجهنا لمكاننا المحدد ..

وجلسنا على الشط .. جالسة اتمشط .. جاها الواوي .. قالها قومي .... هههههههههههههههههه ... المهم .... كان الوقت قريب الغروب لاننا ياحظي انت واياه طالعين من العمل واتجهنا للبحر ..

وشدني تدرج الألوان سبحان مبدعها ... طبعا ازريت اصور مثل المحترفين الكبار ... لكن ان شاء الله اني احترف مثلهم ... ولا انحرف .. .. ^_^

وهنا يوم انها قالت لي فمان الله ... قلت الوداع وخاطري منك ماطاب .. .. * _ *

اما هذي قمت خل اسوي مثل مايسوون بعض ناس يكتبون على الثرى .. وكتبت حاجه اذا شفتوها زين علموني .. .. > _ <

وهنا اقول لكم استمتعوا بالاجواء والمناظر الربانية ولاتفوتنها ...

في حفظ الرحمن

تصاوير 10

بسم الله الرحمن الرحيم ..

اولا وقبل كل شي ... احببت ان اطمن من سأل عن والدي .. انه بخير ونعمة من رب العالمين .. وقد خرج من المشفى .. ولا انسى ايضا ان اشكر كل من اتصل بي هاتفيا .. او ارسل رسالة بالبريد الالكتروني .. فلكم جزيل الشكر والامتنان وهذا دليل على عظيم اخلاقكم وطيب قلوبكم .. ادامكم الله في عز وهناء وسعادة ..

ثانيا .. قبل يومين وتحديدا يوم الجمعه وتقريبا كان الوقت بعد صلاة الفجر .. >> تعبت وانا احتسي فصحى <<< المهم صادف وقت طلعتي من الدوام وكان الجو رهيب من جهتين .. الجهة الاولى رهبة الرعود والبروق .. يا الله كان شي خطير ... سبحان خالقها ومكونها .. والجهة الثانية كان الجو رهيب من ناحية البرودة والهواء الذي يرد الروح ... والله وتمسك معي الا اصور ..

طبعا ماخاطرت بعمري وصورت من اول ماطلعت من العمل لان الطريق مشاكل وعفسه ...

المهم والله وبدينا على بركة الرحمن .. وكانت اول صورة من جهة جامع الامام فيصل بن تركي .... وتلاحظون كيف الوان السماء ..

ثم اتجهت غربا باتجاه طريق الامير نايف .. وتشوفون طبعا تحويلات وعفيسه ... > _<

وهنا بقيت صامدة رغم قوة الريح .. ويبدوا من خلفها .. ابراج مبنى التلفزيون ..

وهنا شي عجيب .. الشمس .. والغيوم .. وسبحان الله ..


وهذي تابعة للي عند الجامع بس من جهة ثانية ... ^_^



وبس ..
شكرا لكل من مر من هنا .. شكرا لك من سأل .. شكر للجميع

تصاوير 9

سلام الله عليكم ايها القوم ...

كيف حالكم ..؟ عساكم متدفين زين عن البرد ...؟ ترى حن ماجانا برد للحين .. ماغير هبايب ...

طبعا صاير لي فترة وانا متغير .. مدري وش صايبني ...( ادري بيقولون عين .. هذا حنا يالعرب ... اي شي قالوا عين .. ) الا على طاري العين احس .. لا ما احس .. الا متأكد ... ثلاث ارباع الشعب يعاني من العين .. الله يفرجها علينا وعليهم ويكفينا شر ماهو قادم..

عموما احباب قلبي لا احد يدقق ....

مثل ماتعودنا من يوم فتحنا البقالة اقصد المدونة .. خصوصا اذا كان الموضوع مثل ماهم مكتوب فوق ..,,( عجزان لايكتبه مره ثانيه .. ) ههههههه المهم كل وشسمه له شسمه ..

نبدأ على بركة الله ..

هذا الله يسلمكم يمكن قبل شي اسبوعين تقريبا .. قررنا نحن ال بيتنا ... نتجمع عند باب العماره .. اقصد في الحوش .. وفي رواية اخرى تهوية .. وفي رواية شاذه .. برندا ... المهم كان الجو عليلا وجميلا وكل ابو الصفات الحميده كانت فيه ذاك اليوم .. المهم و تجمعنا الحمد لله .. وقرروا آل بيتنا انهم يجيبون شي يوكل في ذيك الحزة ... والله وماقصروا وجابوا لنا اللي بالصورة اللي بعدها ...

اي صح نسيت قولوا ماشاء الله .. لاتجينا عين ... ^_* ....

طبعا الصورة هذي مدري وش موقعها من الاعراب لكن تعبر عن نفسها ....

من لايشكر الناس لا يشكر الله ... هذا الله يسلمكم ... قبل شي اسبوع تقريبا .. كنت عازم لي شباب على العشاء .. المهم والله ماقصروا الاهل .. وخصوصا اختي .. فتاة الثلاثين .. سابقا ^_^ علبة ألوان حاليا ^_* وتكفلت بالمهمة وابدعت عسى ايدينها وايدين اللي عاونوها ماتويج على النار ...

شكرا أبي ... شكرا أمي ... شكرا أختي .. شكرا للجميع ..
سمو على واجبكم ... واسمحونا على القصور .. لاحد يستحي يالربع .. ^_^

حي الله من جانا .. ابرك من يجينا .. يالله حيهم ..

اما هذي الصورة عجيبة .. سبحان الله .. تحديدا قبل يومين بالضبط كانت هناك امطار على مدينة الدمام وكنت وقتها في العمل وكان الوقت تقريبا الساعه 11.30 مساء او زيادة .. المهم كنت واقف وماسك الكاميرا اشوف الاعدادات فيها وكانت الدنيا تبرق .. المهم قلت ابغى اصور البرق مثل اللي اشوفه في صور المحترفين .. المهم وانا احاول صورت تقريبا 40 او 45 صورة للبرق ماطلعت الا بالصورة هذي .. وكأنها في الصباح او بداية الاشراق ..









نشوفكم على خير في الحلقة القادمة .. تابعونا ..

احد العظماء ..

بسم الله الرحمن الرحيم ..

الحمد لله الذي انعم علينا بنعمه التي لاتعد ولا تحصى .. الحمد لله الذي وهب لنا البصر .. الحمد لله الذي وهب لنا البصيرة ..

احبتي زوار مدونتي ...

لقد سبق لي أن قرأت كتاب عظماء غيروا مجرى التاريخ .. وأعجبت بقصصهم .. والمواقف الصعبة التي تجاوزوها .. بإيمانهم .. وقوتهم الكانة في دواخلهم ..

اليوم وتحديدا قبل ساعة من كتابة هذا الموضوع حصلت على مدونة احد العظماء الذين لهم حق علينا ان نسطر تاريخهم بماء الذهب ..

احد العظماء الذين ليس بغريب انهم يتخطون عقبة تصيبهم .. مثلا هناك الشيخ العلامة عبدالعزيز ابن باز .. قد كان فاقد للبصر .. ولكن الله عوضه بالبصيرة .. عوضه ان يرى من خلال قلبه وعقله .. اليوم زرت مدونة احد العظماء اسمه فيصل الغامدي .. وقرأت فيها بعض المواضيع ولكن اكثر ما شدني موضوع هو كاتبه .. عام من التدوين .. اكتشفت من خلاله انه فاقد للبصر ..

ولكن الله سلم له وعوضه بالبصيرة .. هؤلاء هم العظماء .. لقد اجرى الدمع من عيني .. ليس شفقة عليه .. لا والله .. انما شفقة على حالنا .. شفقة على انفسنا ... لقد اخذ اليأس مبلغه عند بعضنا .. رغم مانقرأ وما نسمع عنه .. الا اننا سمحنا له بالتمكن من قلوبنا ..

لعلي هنا ومن خلال هذي المدونة الاكثر من رائعة ان تكون بداية الانطلاق لنا .. ونهاية لليأس .. وان نكون ايضا مغيرين للتاريخ وللافضل بكل تأكيد ..

هذا وهورابط المدونة لمن لا يعرفه

http://faisalit.com/blog/

تحياتي لكم جميعا .. والى التقدم الذي ينتظرنا جميعا ...

في امان الله ..

صوغة الحجاج

السلام عليكم ورحمة الله وبركاته

اسعد الله اوقاتكم بكل سعادة وفرح ...

هذا الله يسلمكم امس صادف وصول حجاجنا من رحلتهم الايمانية عسى الله يتقبل حجهم ويقبلهم عنده ...

المهم كان من ضمن امتعتهم صوغة ( هدية ) حجاج ومن بينها حاجة قديمة مررررة .. امي الله يطول بعمرها على طاعته تقول ان جدي الله يغفر له كان يجيبه لهم اذا رجع من الحج .. وللمعلوم نفس المواد سابقا هي نفسها حاليا ... يالله ذكريات الكل امس عاش الماضي البعيد والقريب ... فحبيت انكم تشوفونها ويمكن احد الزوار مالحق عليها او ماشافها ففرصة يشوفها الحين ...

تمنياتي لكم بالسعادة والعودة للماضي ...

هذي صورة الحلويات او المكسرات سموها مثل ماتبون هي اللي قديمة

هذي مجموعة كاملة للهدايا ..