الأحد، 31 يناير 2010

تصاوير 13

السلام عليكم ورحمة الله وبركاته ..
صبـاحـ / مساكـ .. ــم خير وسعادة ورضا ...
كالمعتاد زواري ومتابعي ثنايا بيتي الصغير ... لمن دخل جديد ... صورة وقصة او موقف لها ...

شريت لي ثوبٍ على شان لقياك .... والثوب راحت موضته مالبسته
وشريت عطرٍ ما زهاني بلياك .....أربع سنين بعـــلبته مالمــــستـه
ودفتر قصيدٍ كل يوم يترجاك ...... مافيه يومٍ مــاسهرت ودرستــه


صحيح ان الابيات فيها شوي حزن لكن هي اللي حصلتها في الملفات المحفوظه عندي .. تتكلم عن العطر ...
من لايشكر الناس لا يشكر الله ... قبل تقريبا اسبوع اهدتني اختي فديت راسها .. عطر .. كرد جميل من اللي سويت معها لكن حز في خاطري انها تفكر ترد لي جميل سويته معاها .. انتي اختي .. انتي عيوني اللي اشوف بها .. ومهما سويت لك او معاك يبقى قليل .. وهذا واجبي ..
ان ج ـيت يمك شارد الفكر > ضايق <مع بسمتك تنزاح لوع ـات الاع ـماق

هذي صورة عطرها الله يطيبها من طيب الجنه ان شاء الله ...


آنآ آشهد آن مآ كْـل آلآزوآل... آزوآل ..
و لوهآ تشآبه.. آنت مـآ لـكْ مشآبِـه
إنت {آلغلآ}.. وآنت {آلسعد}.. وآنت {آلآمآل} ..
وآنته دعآء آمـي .. بوقـت آستجآبـه ..!!




اما هذي الصورة ... سبقتني اختي فتاة الثلاثين ... في مدونتها ... ونزلتها ... وبحكم ان حفل الخطوبة للنساء كان في بيتنا .. طبعا في صور كثير ماقدرت اصورها لكن اختي وفت وكفت .. ماقصرت لكن من باب التحدي بيني وبينها .. قلت انزل الصورة هذي ... ونشوف من اللي تصوريه احلى ... ^_*



اما هذي الصورة كانت في نفس يوم ملكة بنت اخوي .... يوووووووه .. نسيت ابارك لها ... بارك الله لكما وبارك عليكما وجمع بينكما في خير .. .. المهم عاد ان عشاء الرجال كان في بيت اخوي .. والجو ذاك اليوم كان بارد مره .. وعلى ذمة الارصاد .. قالوا ان ذاك الليل كانت درجة الحرارة 8 درجات .. المهم شبة الضوية ترد لي الروح دايم ... وان شاء الله .. راح نطلع البر قريب بإذن الواحد الاحد .. وان شاء الله نستمتع بطبيعة الرحمن واحاول امتعكم معاي ..






قبل الختام ابيات عجبتني ..
أرفع الراس بين الروس ما همه
وأتباهى وأنا الغرقان بأوجاعي
يمه.. الحر طبعه يعشق القمة
وأنتي اللي فطمتيني على أطباعي
الهواء دام راسي حي ويشمه
والله اني لاسوق هناك ذعذاعي
غربة تلوي ذراع أشجع الخمه
لا تخافينها لو تقلب أوضاعي
يمكن تبعثر الرجال وتلمه
بس !! بدري عليها تلوي ذراعي

الأربعاء، 20 يناير 2010

تصاوير 12

السلام عليكم ورحمة الله تعالى وبركاته ...
شلونكم احباب قلبي .. ان شاء الله طيبين ..
اول شي ... اشكر الله على عطائه ونعمه ... ثم اشكر كل من سأل عني برسالة .. او ايميل .. او تعليق .. او غيره .. لهم من قلبي عظيم الشكر والامتنان .. وستعرفون لماذا غبت عن المدونة كل هذه الفترة ... ان شاء الله ...
كالمعتاد من العنوان .. صورة وقصتها .... نبدأ على بركة الرحمن ....
الصورة اللي تحت هذي سبق وان طلب مني المدون العزيز .. هذا أنا ( الاستاذ اياد ) بتصوير مشكلة عويصة عندنا بالدمام وهي التحويلات .. لاني كنت ناوي انزل موضوع عنها وسبقني استاذنا العزيز ... ولكن لم يمانع من انزال الصور ... ولكن انا اخلفت بالوعد وماتمكنت من التصوير .. لعدة اسباب .. وستعرفون بعضها ... المهم هذه التحويلة للقادم من الجنوب للشمال ( من من مخطط 37 باتجاه الجلوية .. على امتداد شارع الامير نايف .. وعلى فكرة ترى كثير شوارع اغلقت من قريب ... لكن الله المستعان وهو خير الحافظين ...
هذي محاولة مني لتصوير القمر في منطقة مليئة بالاضواء ... وصراحة اول مرة تطلع معي الصورة واضحه لاني حاولت من قبل اكثر من مرة ولكن الحمد لله هالمرة طلعت واضحه وخصوصا انه كان بدر ...


هذي الصورة كان وقتها وان كان ماني غلطان عصير ..( عصير يعني وقت العصر .. للي مايعرف ..) كان شكل تقاطيع السحب جميل وانبعاث الشمس من بينها اكثر من رائع ... سبحان مكونها وناشرها ومبدعها ...


اما هذي الصورة فهي قبل نزول الموضوع بدقائق معدوده ... مثل ماتشوفون ... كتب وملخصات واوراق وعفيسه .. لكن الحمد لله كان تيسير من رب العالمين ... وكانت هي سبب انقطاعي عن عالم الانترنت .. ونسأل الله التوفيق لي ولجميع الطلبة ..


اما هذي الاخيرة ... فهي هدية بسيطة لكل من مر من هنا ... وبالأخص من سأل عني ...

الله لايحرمكم الاجر ..




سامحوني على التأخير .. وعلى عدم مراعاة شعور الاحباب .. قد تكون انانية ولكن مجبر عليها ..( مجبر اخاك لا بطل )

الله يحفظكم ويرعاكم ..