السبت، 29 أغسطس 2009

رحت وشفتها ...

السلام عليكم ورحمة الله وبركاته ...
اول شي اعتذر منكم زواري الكرام شديد الاعتذار لاني متأخر في مباركة الشهر وطرح الموضوع لكن تجيكم القصه ...
مبارك عليكم الشهر الفضيل شهر الخير وجعلكم الله من صوامه وقوامه وعتقائه .. وبارك لكم في الايام اللي مضت ويبارك لكم في الايام القادمه واعانكم على صيامها وقيامها .....
هذا الله يسلمكم ...كنت مسافر الى بيت الله الحرام من قبل رمضان .... ورحت عشان اشوف حبيبة الكل ... وهي اللي ماخلتني ابارك لكم واتواصل معكم ..... طبعا بدون كثر حكي ماله داعي ...
كيف حالك يا ..... ؟؟؟ وشلونك.....؟؟؟؟ هههههههههههههه
عادي سؤال مر في بالي وانا اكتب البوست لاحد يشيل همه ....
المهم هذي الصورة اللي حدر هالسطر كانت اول يوم وصلنا فيه مكه الصبح واحنا رايحين ناخذ عمرتنا ...
اما هالصورة هي حبيبة الكل ...الله يحميها ويحفظها ....
وه بس ياقلبي عليها .. تشرح الصدر اذا شفتها يالبى قلبها فديتها ... صورتها وانا نازل لها ...
اما هذي وانا على الدرج نازل يالبى قلبها ماقدرت اشوفها وما اصورها .... طبعا هالصوره واللي قبلها كانوا تقريبا قبل صلاة العشاء


اما هذي لها قصة عجيبه سبحان مبدعها ... كان هذاك اليوم يوم جمعه اذا مااخانتني الذاكرة ... كان الجو صافي وكانت الساعه 4 عصرا وكان الهواء حلو ... المهم شوي وانا اتمشى في ساحة الحرم انا و اختي .. الا السماء مثل ماتشوفون تحت واكثر من كذا بعد .. شوي الا الدنيا ظلام يعني ماجات الساعه 5 الا الدنيا ظلام سبحان الله شي عجيب غريب وهواء ..لالا مو هواء الا قولوا عاصفه شي لايصدق المهم ان كل اللي كانوا خارج الحرم صاروا داخل ... والاغلب كانوا متوجهين للكعبة وراح اوريكم تصوير فديو قصير ..وفجأة سبحان الله في ثواني نزل مطر واستمر تقريبا من الساعه 5 الى الساعه 6 او زيادة شوي المهم وقتها انا انشغلت وماقدرت اصور لكم المطر لكن ان شاء الله اشوف اذا موجود صورة او مقطع لو شي بسيط عن الامطار ... الحمد لله على نعمه وعطاياه ...




اترككم مع المقطع الصوغير ....


الاثنين، 17 أغسطس 2009

تـم الافتـتـاح


اسعد الله اوقاتكم جميعا بكل خير وسعادة وفرح وتحقيق اماني ...
هذا واحد من الزملاء المقربين ..الله يبارك له ... الرجال عزم وخطط وبدأ التنفيذ ... والحمد لله تم الافتتاح ... كان يعلمني بكل خطوة يسويها .. كانت فكرة في المخ ... اصبحت على ورق ... بدأ التخطيط والعزم ... بدأ وضع اول قدم على السلم ... تم التنفيذ.. انتظرنا الافتتاح ... فترة ليست قصيرة لكن بحمد الله تم الافتتاح .... الله يبارك لك في رزقك ويزيدك من نعيمه ياخو قلبي والله انك تستاهل كل خير .. عسى الله يوفقك وييسر امرك ويفتح ابواب الرزق .. الموهيم انتوا مالكم في الطويله .... اللي يبي يروح للمحل يرسل لي رساله وانا اتوصى فيه ^_^ المحل ياطويلين العمر والسلامه ..... مطعم للمأكولات الشعبية ... *_^ نقهر بعض ناس ... بس ماعليه نصير كرماء والغداء على حسابي ... اسم المطعم ... دار الحجر للمأكولات الشعبية .. الاسم يرمز الى مكان مشهور في دولة اليمن الشقيقه .. وهو تراثي وقائم ... ويمتاز باللون البني الغامق لذلك تم وضع لمسات بسيطه للمحل بنفس اللون ..... اضع لكم بعض الصور واعتذر عن عدم وضعها كامله لضيق الوقت ... ولتعذرني اخي لعدم وضع الصور كاملة ...
بالصحه والهنا يا اللي تشوفون ... *_*

واجهة المحل

قائمة الاسعار



ركن الطاولات وعليها مفرش بشكل الغترة

ركن الجلسة الأرضية مزين بالسفرة القديمة


السبت، 1 أغسطس 2009

لغتي الثانية
















السلام عليكم ورحمة الله وبركاته ..
اسعد الله اوقات الجميع بكل سعادة وهناء .. اشتقت لكم ولمدونتي ولزواري ولكل ابو شي هنا في البيت الصغير .. طبعا اليوم جاي وجايب معي موضوع جديد بالنسبة للبعض ولكن ماذكر اني مريت على مدونه تكلمت عن موضوعي ..
طبعا محدثكم عربي ولغتي عربية لكن عندي لغة عربية ثانية وبشكل ثاني .. ياربي لك الحمد ...
الاكيد ان اغلبنا واغلب من نعرف سليم ومعافي في بدنه وبالاخص لسانه وسمعه ..هناك فئة غالية كثيرا على قلبي .. ولله الحمد والمنه اني كنت شقيقا لأثنين من هذه الفئة ..وزميلا لزملائهم ... لحست مخكم صح هههههه عادي ...
قبل فترة بسيطة دار بيني وبين احد الزملاء حوار طويل عريض ... لكن محور عن ( الصم والبكم ) ... وعن لغتهم لغة الاشارة ... هو يعلم انه لدي 2 من اشقائي صم وبكم .. ويعلم مدى عشقي لهذه اللغة التي يعتقد البعض انها صعبة .. ممكن تكون في البداية لكن هي سهلة ... المهم كان في نهاية الحوار طلب مني اعلمه اللغة ... لكن طبعا الى الان ماصار شي لكني علمته بعض الاشارات البسيطه اللي ممكن يتسخدمها مع الشاب الاصم عشان يعرف بس كيف يتعامل معه بشيء بسيط ...
لذلك وضعت اشارات لاسمي شاب طموح تبين لكم طريقه الحرف وتشكيله باليد ...
لغة الاشارة تعتمد على عدة عناصر ... اولها ان تكون بإشارة كل حرف ... ثم عند نطق الحرف يجب ان توضحه عن طريق الشفاه وهي الثانية .. ثالثا والاهم تركيزك وبالاخص عينيك على الشخص المقابل لك ...
سأكون مقصرا مع هذه الفئة ... لن اتمكن من وضع جميع الحروف 28 ولكن من ارد ذلك فلن يكون صعبا البحث عن افضل المواقع لتعلم تلك اللغة ... اللهم لك الحمد على نعمك الكثيره ... ولك الحمد على سلبك بعض هذه النعم من اخواننا وخاصة نعمة السمع والنطق .. ولك الحمد على تعويضك لهم عنها بنعم اخرى لاتعد ولاتحصى ... اللهم لك الحمد حتى ترضى ولك الحمد اذا رضيت ولك الحمد بعد الرضى ..