الاثنين، 29 يونيو 2009

تحت رجلها تلقونها ....


الموضوع كبير جدا واكبر من بوست واحد او اثنين او عشرة .... موضوعي عن اللي تحت رجلها الجنه .. الأم ...
انا ماقدر اكتب عن الأم ... لكن راح اكتب بعض الكلمات عن العقوق .... بصراحه انا شفت حلقة من حلقات برنامج 99 على القناة الرياضية السعوديه وكان الموضوع عن عقوق الوالدين وكان فيه مقابلات مع شباب عاقين ... ومع أم ... عقوا بها عيالها ... حسبي الله عليهم ... المهم جبت الرابط وشوفوا وش سوى العصاة العاقين اللي مايخافون الله ....



وبعد ماشفت الحلقة كاملة كان في اتصال بيني وبين احد الزملاء وهو شاعر وطرحت عليه الموضوع قال اسمح لي يا شاب ... الأم ماقدرت اكتب عنها لانها اكبر من كل الكلمات .... قال المهم هذا شاعر كتب قصيده عن امه وهذي ابياته اختمه فيها البوست واسمحوا لي لانها أم ... اعظم قلب ... احن مخلوق ...


من قبل لاتاصـل وصل قبلها الطـيب=لاجيـت اقبـل راسهـا ريـح حنـه

الحـب نـارٍ فــوق روس المـراقيـب=واللـي يعـدي الضـلع ماخاب ضنه

حبـي لهـا مافيـه شـــكٍ ولا ريـب=كنـه ورى عــوج المحــاديب كنه

ماهو هـوى اللي فـي جـحور السراديب=واليوم الآخـــر لـو يقفــي نسنه

مهما كبرت ولآح فـي عارضـي شـــيب=فـي عينهـا طـفـلٍ صغـيـرٍ تحنـه

امي هـواها بيـن ذيـك المحـاديب=مـن تحـت رجــليها والأقدام جـنه

يازيـن لاقـالت وهـي عنـي اتغيـب=ياريـحة أمـي ريـحته غـبت عنـه

لاصــار بـي شــيٍ لـو انـه أكـاذيب=قـامـت تجــر امـن المعـاليق ونـه

يـومـي صغـير ولاعـرفت المــواجيب=يـوم اقـصـرانا بنت الاجـواد بنـه

لآجيت ابطـلع قـلـدت عـويت الـذيب=قـالـت تـرى بـرا يـعضـك بـسـنه

ولآجيتهـا بريـح الحطـب والمحـاطيب=ريـح الحطـب بالثــوب قـامـت تـكـنه

ياجـعـل يـفـداهـا بـناتٍ رعـابـيـب=واللــي يـبيهـن يومـهـن مايـبـنـه

ماقـصــرت ربـت أرجــالٍ اصـاعـيـب=صـغـيرهـم شـقـح العـذارى نـخـنـه

ابـوي مـات اللـي يحـل المـنـاشيـب=يـومـه عـلـى رجـلـه وانا جيـت مـنـه

قـلته وانا من راس قــومٍ مجـاذيـب=سـيـفٍ لنا فـي وجـه الأعـداء نسنه

يمه كــبرت ولآيـخـوفـنـي الـذيــب=الحـين انا ذيـبٍ ولـي نـفـس سـنـه


الأحد، 21 يونيو 2009

عفوا أيها الشيخ .....

عفوا أيها الشيخ .. عفوا أيها الحكيم ... عفوا أيها الكبير بأخلاقك ... وحركاتك وسكناتك ... عفوا أبي ....
يا يبه سامحني عجزت اكتب عنك حاولت وحاولت وكل ما اكتب حرف يطلع جنب الحرف مجلد عنك ... سامحني يبه كل مافكرت بشيء لقيت أشياء واجد لازم تنكتب عنك ....
يابوي ياعزوتي يامحزمي ... انا مالي طلب غير انك تكون دوم راضي عني ... وعن أخواني وأخواتي ...
يا يبه مرت ستة أيام وانت بعيد عن البيت ... ستة أيام مرت بدونك والبيت والله الكل يقول أنه أظلم ... الكل يسأل عنك
أمي ..خواتي ..اخواني ... أحفادك ... جيرانك .... المسجد يسأل عنك ... محرابك يسأل عنك ... الشارع يسأل عنك يقول وين اللي كان يمشي من هنا قبل اذان الفجر ... المحراب يقول وين اللي يصلي هنا قبل اذان الفجر .... الجيران ... وانا والكل نسأل عنك ...
عسى الله لايحرمنا منك يابوي
اسأل الله العظيم رب العرش العظيم ان يشفيك ويردك لنا سالما غانما معافى ... ويطيل في عمرك على طاعته ... ويعننا على برك وطاعتك ...
سامحني يابوي مقدر اكتب عنك ... تأبى الحروف والكلمات عن الخروج ....
اضحك عساك مجار ياطيب الفال
اضحك عسى الدنيا يزلك زعلها
اضحك ترى والله ماجا على البال
ابرك من الضحكة ووجه ٍ حملها
يابوي ياعمي وياجد ياخال
يازينة الدنيا وصافي عسلها
يانور عيني جوهر الروح والحال
ياللي الى ثقلت ومالت عدلها
ياللي الى صكت علي بعض الاحوال
زبنت لك ياراس عالي جبلها
ياللي محلك للمسايير مدهال
يفداك من عد الهلل كيف كلها
للعطف في صدرك منارات وازوال
وبشاشة فيك انت زانت حللها
شمس ٍ بنورك هضبةٍِ فيّها مال
ريف القلوب اللي تعاقب محلها
ياسيدي ياسيد عذبات الاقوال
ياسمعة ٍ من كل طيب ٍ شملها
والله يالك فالمعاليق منزال
ومرابع ٍ ماعمر حي ٍ نزلها
تفداك عيني لا ولا هيب مثقال
من نور عينك مير ابضرب مثلها
والا انت لو عندي غريبات الامثال
ازهد بها لو كان مالقى بدلها

الأربعاء، 17 يونيو 2009

الهدره المغربيه


اليوم بصراحة في خاطري اكتب عن البلد الجميل المضياف الساحر بجمال الطبيعة وجمال أخلاق اهله .. المغرب ..

بس خوفي اني ما اوفي البلد حقها .... فيزعلون مني اهلها .... والهدف الثاني تعليم بعض ناس اعرفهم يبون يتعلمون بعض الكلمات عشان يمتحنوني بالبيت وانا داخل ووانا طالع ... والله وناسه تصير سوالفنا بالمغربي .... بدون تطويل في الهدره الخاويه ...

كداير ... كيف الحال ...

لاباس عليك ...ان شاء الله انك بخير ....<<هذي بكيفي ...

اش حال في الوقت ... كم الساعه ؟

نستقصي نسول .... نسأل عن...

يتعاودوا ....يسولفون

ماكاين والو ..... مافي شي

بالصح ..بتشديد الصاد ..... صحيح والله ؟

واخه ..... طيب او حسنا ..

اشكون كاين ؟..... من اللي موجود ..؟

شكون سميتك ...؟..... وش اسمك ..؟؟

الهدره ...الكلام

الهدره الخاويه ..... الكلام الفاضي اللي ماله معنى

آجي .... تعال

توحشتك ....اشتقت لك ...

فاش خدام ...وين تشتغل ؟...

ديالي ..... حقي او تبعي ...

ياسعداتك ......ياحظك ...



راني باغي نكمل لكن نخاف يغضبوا منا ....

راني كنبغيهم بالزاف بالزاف ....

مابي اطول اخاف اقصر معهم لكن اتمنى من اي شخص مغربي يزور مدونتي يعلمني ونستفيد منه بعد ... ولهم ولكم مني احلى تحية وباقة ورد ...






الثلاثاء، 9 يونيو 2009

تصاوير 5

ايه صح ... اسعد الله اوقاتكم بكل خير ... شلونكم شخباركم ... شلون استعدادكم للاختبارات ياهل السعوديه ... لان حبايبنا في الدول الي قريبين من عندنا على ما اعتقد انهم خلصوا اختبارات او كذا يعني ... المهم .. الله يوفقكم ويسهل اموركم ويساعدكم ويسخر لكم كل المخاليق ...
على طاري الامتحانات يقولون انه تكثر طلبات الاكل وكذا يعني ... حنيت عليكم يا اهل المدارس والكليات هذا سفرة خفايف حليوة مني لكم مساعدة ودعم للمذاكرة والاجتهاد عشان تنجحون وترفعون راس اباءكم وامهاتكم عسى الله يخليهم لكم ....























اما هذي الصورة اللي تحت مرة كنت اسولف مع واحد من الربع واسأله عن الصورة وش رايك فيها ياسعيد ...؟ قال تبي رايي ابشر ..
الثلاث وردات هم ...انا (يقصد نفسه ) ونايف وتركي .... وساق النخله هذا علاوي ... وسعف النخله هذا شعرك وانت صاحي من النوم (يقصد شاب طموح) ههههههههههههههههه... الله يقطع ابليسك ياسعيد ....

الأربعاء، 3 يونيو 2009

تصاوير 4

يالله انك تحييهم كلهم من ادناهم الى اقصاهم ....
بصراحه انا مبطي عن المدونه لكن متابع عن كثب .....<<<< متعوب عليها العباره خخخخ
اي والله اني مهمل بيتي الصغير ومشغول في ذا الدنيا عسى الله لا يشغلنا الا في طاعته قولوا امين ...
المهم وبما اني كذلك فقررت اني اجدد نشاطي وحماسي اللي خذته المشاغل فمثل ماتعودنا كل صورة ولها قصة وكذا يعني ...
نبدأ على بركة الله بأول صورة وهي تتكلم عن نفسها ...



هذي الله يسلمكم تخبروني يوم اني انزل بوست بعنوان مسافرة اللي هي طبعا امي الله يحفظها ويشفيها ويعافيها ويطول بعمرها على طاعته ..الموهيم وانا طالع من ذيك الديرة ماهي اول مرة اشوف منظر النخيل لكن كنت هذاك الوقت ماعندي كاميرا اصور فيها ولكن الحمد لله الحين غير وقبل غير ... تطورت منفوحه هههههه ... الموهيم قلت لازم اخذ صورة لها المنظر ولكن اعرف انه ماراح يبرد تشبدي بس قلت ان شاء الله اصور النخل اللي عندنا بالعمل ومن فوق هام السحب بعد فهذي هي الصور اللي من فوق هام الكتوف ...


ومثل ماتعرفون فوائد النخيل وماتنتجه وعلى فكره ترى هذا وقت الثمار الحين الله يازين الرطب خصوصا الاخلاص يالبيه واذا كانت القهوة عليها شوي زعفران مع عويدي (المسمار) ولغير الناطقين بلهجتنا هو القرنفل ^_^ اعرف اشرح ..يعني اصير معلم ...

نجي للكلام اللي يخلي الواحد يقوطر من السعابيل هذاك اليوم قلت لشوفة عيني ( أخيتي .. عسى الله يوفقها ويحفظها ) تسوي لي عشاء لان عملي آخر الليل ...مشكلة لاصرت انسان مهم ...<<يرفع لنفسه >> المهم والله ماقصرت وسوت لنا اصابع لازانيا آآناآآآآآآآآآآآآه شي شي خوقاااااااااق ... وسوت مع بف باستري بالجبن والعسل آآممممممممم لذيذ ... صحيح هو عشاء خفيف لكن خير وبركة ونعمة من الله عسى الله يدومها علينا ويحفظها .... المهم واروح العمل الا وذاك النشمي رفيدزي ( زميلي ) جايب معه حاجه كذا مشهورين فيها أهل جدة ويحبونها حيل .... بدون مانكثر شرح شوفوا الصورة واحمدوا الله على النعم .. لانها فعلا تستحق الشكر ومهما شكرنا الله نبقى مقصرين ..

وهذي ختام هذا البوست ولكن لازم انزلها واكتب تحتها ........

راح الي تخر الارض من هيبة مقامه
راح الي تضيق الوسيعة عند احزانه
راح الي تغار دموعه من كثر ضحكاته
..... رحمة الله عليك ياعمي راحمة واسعة واسكنك فسيح جناته وتغمدك بواسع رحمته وجميع موتى المسلمين